ABRIRNOS AO MISTERIO DE DEUS
Ao longo dos séculos, os teólogos realizaron un gran esforzo por achegárense ao misterio de Deus formulando con diferentes construcións conceptuais as relacións que vinculan e diferencian ás Persoas divinas no seo da Trindade. Esforzo, sen dúbida, lexítimo, nado do amor e o desexo de Deus.
Xesús, con todo, non segue ese camiño. Desde a súa propia experiencia de Deus, convida aos seus seguidores a relacionárense de maneira confiada con Deus Pai, a seguiren fielmente os seus pasos de Fillo de Deus encarnado, e a deixárense guiar e alentar polo Espírito Santo. Ensínaos así a abrírense ao misterio santo de Deus.
Primeiro de nada, Xesús convida aos seus seguidores a viviren coma fillos e fillas dun Deus próximo, bo e entrañábel, ao que todos podemos invocar como Pai querido. O que caracteriza a este Pai non é o seu poder e a súa forza, senón a súa bondade e a súa compaixón infinitas. Ninguén está só. Todos temos un Deus Pai que nos comprende, quérenos e perdóanos como ninguén.
Xesús descóbrenos que este Pai ten un proxecto nado do seu corazón: construír con todos os seus fillos e fillas un mundo máis humano e fraterno, máis xusto e solidario. Xesús chámao «reino de Deus», e convida a todos a entrar nese proxecto do Pai buscando unha vida máis xusta e digna para todos, empezando polos seus fillos máis pobres, indefensos e necesitados.
Ao mesmo tempo, Xesús convida aos seus seguidores a que confíen tamén nel: «Non se turbe o voso corazón. Credes en Deus; crede tamén en min». El é o Fillo de Deus, imaxe viva do seu Pai. As súas palabras e os seus xestos descóbrennos como nos quere o Pai de todos. Por iso convida a todos a seguilo. El ensinaranos a vivirmos con confianza e docilidade ao servizo do proxecto do Pai.
Co seu grupo de seguidores, Xesús quere formar unha familia nova onde todos busquen «cumprir a vontade do Pai». Esta é a herdanza que quere deixar na terra: un movemento de irmáns e irmás ao servizo dos máis pequenos e desvalidos. Esa familia será símbolo e xerme do novo mundo querido polo Pai.
Para isto necesitan acolleren ao Espírito que alenta o Pai e ao seu Fillo Xesús: «Vós recibiredes a forza do Espírito Santo, que virá sobre vós, e así seredes as miñas testemuñas». Este Espírito é o amor de Deus, o alento que comparten o Pai e o seu Fillo Xesús, a forza, o impulso e a enerxía vital que fará dos seguidores de Xesús as súas testemuñas e colaboradores ao servizo do gran proxecto da Trindade Santa.
José Antonio Pagola
Tradutor: Xaquin Campo Freire
