UNHA IGREXA ESPERTA
As primeiras xeracións cristiás viviron obsesionadas pola pronta vinda de Xesús. O resucitado non podía tardar. Vivían tan atraídos por el que querían atopalo de novo canto antes. Os problemas empezaron cando viron que o tempo pasaba e a vinda do Señor demoraba.
Axiña se decataron de que esta tardanza encerraba un perigo mortal. Podíase apagar aquel primeiro ardor. Co tempo, aquelas pequenas comunidades podían caer aos poucos na indiferenza e o esquecemento. Preocupáballes unha cousa: «Que, ao chegar Cristo, nos atopedurmidos».
A vixianza converteuse» na palabra clave. Os evanxeos repítena constantemente: «vixiade», «estade alertas, «vivide espertos». Segundo Marcos, a orde de Xesús non é só para os discípulos que o están a escoitaren. «O que vos digo a vós, dígollo a todos: Velade. Non é unha chamada máis. A orde é para todos os seus seguidores de todos os tempos.
Pasaron vinte séculos de cristianismo. Que foi desta orde de Xesús? Como vivimos os cristiáns de hoxe? Seguimos espertos? Mantense viva nosa fe ou haseir apagando na indiferenza e na mediocridade?
Non vemos que a Igrexa necesita un corazón novo? Non sentimos a necesidade de sacudírmonos da apatía e o autoengano? Non imos espertar o mellor que hai na Igrexa? Non imos reavivar esa fe humilde e limpa de tantos crentes sinxelos?
Non temos de recuperarmos o rostro vivo de Xesús, que atrae, chama, interpela e esperta? Como podemos seguir falando, escribindo e discutindo tanto de Cristo, sen que a súa persoa nos namore e transforme un pouco máis? Non nos damos conta de que unha Igrexa “durmida” á que Xesús Cristo non seduce nin toca o corazón, é unha Igrexa sen futuro, que se irá apagando e avellentando por falta de vida?
Non sentimos a necesidade de espertarmos e intensificarmos a nosa relación con el? Quen coma el pode liberar o noso cristianismo da inmobilidade, da inercia, do peso do pasado, da falta de creatividade? Quen poderá contaxiarnos a súa alegría? Quen nos dará a súa forza creadora e a súa vitalidade?
José Antonio Pagola
Tradutor: Xaquin Campo Freire
