NON APARTAR A NINGUÉN DE XESÚS
Segundo o relato de Lucas, un fariseo chamado Simón está moi interesado en convidar a Xesús á súa mesa. Probabelmente, quere aproveitar a comida para debater algunhas cuestións con aquel galileo, que está adquirindo fama de profeta entre a xente. Xesús acepta a convidada: a Boa Noticia de Deus ten de chegar a todos.
Durante o banquete sucede algo que Simón non previu. Unha prostituta da localidade interrompe a sobremesa, bótase aos pés de Xesús e rompe a chorar. Non sabe como agradecerlle o amor que mostra para quen, como ela, viven marcadas polo desprezo xeral. Ante a sorpresa de todos, bica unha e outra vez os pés de Xesús e únxeos cun perfume precioso.
Simón contempla arrepiado a escena. Unha muller pecadora tocando a Xesús na súa propia casa! Non o pode soportar: aquel home é un inconsciente, non un profeta de Deus. Habería que apartar rapidamente aquela muller impura de Xesús.
Con todo, Xesús déixase tocar e querer pola muller. Ela necesítao máis que ninguén. Con tenrura especial ofrécelle o perdón de Deus, logo invítaa a descubrir dentro do seu corazón unha fe humilde que a está a salvar. Xesús só lle desexa que viva en paz: «Os teus pecados sonche perdoados… A túa fe salvoute. Vai en paz».
Os evanxeos destacan a acolleita e comprensión de Xesús aos sectores máis excluídos, por case todos, da bendición de Deus: prostitutas, recadadores, leprosos… A súa mensaxe é escandalosa: os desprezados polos homes máis relixiosos teñen un lugar privilexiado no corazón de Deus. A razón é só unha: son os máis necesitados de acolleita, dignidade e amor.
Algún día teremos de revisarmos, á luz deste comportamento de Xesús, cal é a nosa actitude nas comunidades cristiás ante certos colectivos como as mulleres que viven da prostitución ou os homosexuais e lesbianas cuxos problemas, sufrimentos e loitas preferimos case sempre ignorar e silenciar no seo da Igrexa coma se para nós non existisen.
Non son poucas as preguntas que nos podemos facer:
- Onde poden atoparen entre nós unha acolleita parecida á de Xesús?
- A quen lle poden escoitar unha palabra que lles fale de Deus como falaba el?
- Que axuda poden atopar entre nós para vivir a súa condición sexual desde unha actitude responsábel e crente?
- Con quen poden compartir a súa fe en Xesús con paz e dignidade?
- Quen é capaz de intuír o amor insondábel de Deus aos esquecidos por todas as relixións?
José Antonio Pagola
Tradutor: Xaquin Campo Freire
