A FORZA TRANSFORMADORA DA LEVADURA
Xesús repetíao unha e outra vez: xa está aquí. Deus tratando de transformar o mundo; o seu reinado está chegando. Non era fácil crerlle. A xente esperaba algo máis espectacular: onde podían captar o poder de Deus impoñendo por fin o seu reinado?
Aínda recordaba Xesús unha escena que puido contemplar desde neno no patio da súa casa. A súa nai e as demais mulleres levantábanse cediño, a véspera do sábado, para elaborar o pan para toda a semana. A Xesús suxeríalle agora a actuación maternal de Deus introducindo o seu «fermento» no mundo.
Co reino de Deus sucede como coa «levadura» que unha muller «mete» na masa de fariña para que «todo» quede fermentado. Así actúa Deus. Non vén impoñer desde fóra o seu poder, como o emperador de Roma. Vén transformar a vida desde dentro, de xeito calado e oculto.
Así é Deus: non se impón, senón que transforma; non domina, senón que atrae. E así han actuar os que colaboran no seu proxecto: como «levadura» que introduce no mundo a súa verdade, a súa xustiza e o seu amor de xeito humilde, pero con forza trasformadora.
Os seguidores de Xesús non podemos presentarnos nesta sociedade como «desde fóra», tratando de impornos para dominar e controlar a quen non pensan coma nós. Non é esa a forma de abrirse camiño o reino de Deus. Habemos vivir «dentro» da sociedade, compartindo as incertezas, crises e contradicións do mundo actual, e aportando a nosa vida transformada polo evanxeo
Habemos aprender a vivir a nosa fe «en minoría» como testemuñas fieis de Xesús. O que necesita a Igrexa non é máis poder social ou político, senón máis humildade para deixarse transformar por Xesús e podermos ser fermento dun mundo máis humano.
José Antonio Pagola
Tradutor: Xaquin Campo Freire
