RECUPERARMOS A XESÚS
Os crentes temos múltiples e moi diversas imaxes de Deus. Desde nenos imos elaborando a nosa propia idea del, condicionados, sobre todo, polo que escoitamos ás catequistas e predicadores, o que se nos transmite na casa e no colexio ou o que vivimos nas celebracións e actos relixiosos.
Todas estas imaxes que nos facemos de Deus son imperfectas e deficientes, e temos de purificalas unha e outra vez ao longo da vida. Non o debemos esquecer nunca. O evanxeo de Xoán recórdanos de xeito rotundo unha convicción que atravesa toda a tradición bíblica: «A Deus non o viu ninguén xamais».
Os teólogos falamos moito de Deus, case sempre demasiado; parece que o sabemos todo del: en realidade, ningún teólogo viu a Deus. O mesmo sucede cos predicadores e dirixentes relixiosos; falan con seguridade case absoluta; parece que no seu interior non hai dúbidas de ningún xénero: en realidade, ningún deles viu a Deus.
Entón, como purificar as nosas imaxes para non desfigurarmos de xeito grave o seu misterio santo? O mesmo evanxeo de Xoán recórdanos a convicción que sustenta toda a fe cristiá en Deus. Só Xesús, o Fillo único de Deus, é «quen o deu a coñecer». En ningures nos descobre Deus o seu corazón e nos mostra o seu rostro coma en Xesús.
Deus díxonos como é, encarnándose en Xesús. Non se revelou en doutrinas e fórmulas teolóxicas sublimes senón na vida entrañábel de Xesús, no seu comportamento e na súa mensaxe, na súa entrega ata a morte e na súa resurrección. Para aproximármonos a Deus temos de achegármonos ao home no que el sae ao noso encontro.
Sempre que o cristianismo ignora a Xesús ou o esquece, corre o risco de afastarse do Deus verdadeiro e de substituílo por imaxes distorsionadas que desfiguran o seu rostro e nos impide colaborar no seu proxecto de construír un mundo novo máis liberado, xusto e fraterno. Por iso é tan urxente recuperarmos a humanidade de Xesús.
Non basta con confesar a Xesús Cristo de xeito teórico ou doutrinal. Todos necesitamos coñecer a Xesús desde un achegamento máis concreto e vital aos evanxeos, sintonizar co seu proxecto, deixármonos animar polo seu espírito, entrar na súa relación co Pai, seguilo de cerca día a día. Esta é a tarefa apaixonante dunha comunidade que vive hoxe purificando a súa fe. Quen coñece e segue a Xesús vai gozando cada vez máis da bondade insondábel de Deus.
José Antonio Pagola
Tradutor: Xaquin Campo Freire
