DA DÚBIDA Á FE
O home moderno aprendeu a dubidar. É propio do espírito dos nosos tempos cuestionar todo para progresar en coñecemento científico. Neste clima a fe fica con frecuencia desacreditada. O ser humano vai camiñando pola vida cheo de incertezas e dúbidas.
Por iso, sintonizamos sen dificultade coa reacción de Tomé, cando os outros discípulos lle comunican que, estando el ausente, tiveron unha experiencia sorprendente: «Vimos ao Señor!». Tomé podería ser un home dos nosos días. A súa resposta é clara: «Se non o vexo, eu non o creo».
A súa actitude é comprensíbel. Tomé non di que os seus compañeiros estean mentindo ou que están enganados. Só afirma que testemuño deles non lle abonda para adherirse á súa fe. El necesita vivir a súa propia experiencia. E Xesús non llo reprochará en ningún momento.
Tomé puido expresar as súas dúbidas dentro do grupo de discípulos. Ao parecer, non se escandalizaron. Non o botaron fóra do grupo. Tampouco eles creron ás mulleres cando lles anunciaron que viron a Xesús resucitado. O episodio de Tomé deixa entrever o longo camiño que tiveron que percorrer no pequeno grupo de discípulos ata chegar á fe en Cristo resucitado.
As comunidades cristiás deberían ser nos nosos días un espazo de diálogo onde puidésemos compartir honestamente as dúbidas, os interrogantes e procuras dos crentes de hoxe. Non todos vivimos no noso interior a mesma experiencia. Para crecer na fe necesitamos o estímulo e o diálogo con outros que comparten a nosa mesma inquietude.
Pero nada pode substituír a experiencia dun contacto persoal con Cristo no fondo da propia conciencia. Segundo o relato evanxélico, aos oito días preséntase de novo Xesús. Móstralles as súas feridas.
Non son «probas» da resurrección, senón «signos» do seu amor e da entrega ata a morte. Por iso, invítao a profundar nas súas dúbidas con confianza: «Non sexas incrédulo, senón crente». Tomé renuncia. Non quere xa verificar nada. Xa non sente necesidade de probas. Só sabe que Xesús o ama e invítao a confiar: «Meu Señor e meu Deus!».
Un día os cristiáns descubriremos que moitas das nosas dúbidas, vividas de xeito san, sen perder o contacto con Xesús e a comunidade, poden rescatarnos dunha fe superficial que se contenta con repetir fórmulas, e estimularnos a crecer en amor e en confianza en Xesús, ese Misterio de Deus que constitúe o núcleo da nosa fe.
José Antonio Pagola
Tradutor: Xaquin Campo Freire
