AMAR A VIDA
A xente non quere oír falar de espiritualidade, porque non sabe o que encerra esta palabra; ignora que significa máis do que relixiosidade, e que non se identifica co que tradicionalmente se entende por piedade. «Espiritualidade» quere dicir vivir unha «relación vital» co Espírito de Deus, e isto só é posíbel cando se experimenta a Deus como «fonte de vida» en cada experiencia humana.
Como expuxo Jürgen Moltmann, vivir en contacto co Espírito de Deus «non conduce a unha espiritualidade que prescinde dos sentidos, só cara a dentro, inimiga do corpo, apartada do mundo, senón a unha nova vitalidade do amor á vida». Fronte ao morto, o petrificado ou o insensíbel, o Espírito esperta sempre o amor á vida. Por iso, vivir «espiritualmente» é «vivir contra a morte», afirmar a vida a pesar da debilidade, o medo, a enfermidade ou a culpa. Quen vive aberto ao Espírito de Deus vibra con todo o que fai crecer a vida e rebélase contra o que a fai dano e a mata.
Este amor á vida xera unha alegría diferente, ensínanos a vivirmos de maneira amigábel e aberta, en paz con todos, dándonos vida uns a outros, acompañándonos na tarefa de facernos a vida máis digna e ditosa. A esta enerxía vital que o Espírito infunde na persoa, Jürgen Moltmann atrévese a chamarlle «enerxía erotizante», pois fai vivir de maneira gozosa, atractiva e sedutora.
Esta experiencia espiritual dilata o corazón: comezamos a sentir que as nosas expectativas e anhelos máis fondos mestúranse coas promesas de Deus; a nosa vida finita e limitada ábrese ao infinito. Entón descubrimos tamén que «santificar a vida» non é moralizala, senón vivila desde o Espírito Santo, é dicir, vela e amala como Deus a ve e a ama: boa, digna e bela, aberta á felicidade eterna.
Esta é, segundo o Bautista, a gran misión de Cristo: «bautizarnos con Espírito Santo», ensinarnos a vivirmos en contacto co Espírito. Só isto nos pode liberar dunha maneira triste e raquítica de entender e vivir a fe en Deus.
José Antonio Pagola
Tradutor: Xaquin Campo Freire
