O DECISIVO É TER FAME
O evanxelista Xoán utiliza unha linguaxe moi forte para insistir na necesidade de alimentarmos a comuñón con Xesús Cristo. Só así experimentaremos en nós a súa propia vida. Segundo el, é necesario comer a Xesús: «O que me come, vivirá por min».
A linguaxe adquire un carácter aínda máis agresivo cando di que hai que comer a carne de Xesús e beber o seu sangue. O texto é rotundo. «A miña carne é verdadeira comida, e o meu sangue é verdadeira bebida. O que come a miña carne e bebe o meu sangue habita en min e eu el».
Esta linguaxe xa non produce impacto algún entre os cristiáns. Habituados a escoitalo desde nenos, tendemos a pensar no que vimos facendo desde a primeira comuñón. Todos coñecemos a doutrina aprendida no catecismo: no momento de comulgar, Cristo faise presente en nós pola graza do sacramento da eucaristía.
Por desgraza, todo pode ficar máis unha vez en doutrina pensada e aceptada piadosamente. Pero, con frecuencia, fáltanos a experiencia de incorporarmos a Cristo á nosa vida concreta. Non sabemos como abrírmonos a el para que nutra co seu Espírito a nosa vida e a vaia facendo máis humana e máis evanxélica.
Comer a Cristo é moito máis que adiantármonos distraidamente a cumprir o rito sacramental de recibir o pan consagrado. Comulgar con Cristo esixe un acto de fe e apertura de especial intensidade, que se pode vivir sobre todo no momento da comuñón sacramental, pero tamén noutras experiencias de contacto vital con Xesús.
O decisivo é ter fame de Xesús. Buscar desde o máis profundo atopármonos con el. Abrirnos á súa verdade para que nos marque co seu Espírito e potencie o mellor que hai en nós. Deixarlle que ilumine e transforme zonas da nosa vida que están aínda sen evanxelizar.
Entón, alimentarnos de Xesús é volver todo o máis xenuíno, o máis simple e máis auténtico do seu Evanxeo; interiorizarmos as súas actitudes máis básicas e esenciais; acendermos en nós o instinto de vivir como el; espertarmos a nosa conciencia de discípulos e seguidores para facer del o centro da nosa vida. Sen cristiáns que se alimenten de Xesús, a Igrexa languidece sen remedio.
José Antonio Pagola
Tradutor: Xaquin Campo Freire
