ACOLLER AOS PEQUENOS
O episodio mesmo parece insignificante. Con todo, encerra un trasfondo de grande importancia para os seguidores de Xesús. Segundo o relato de Marcos, algúns tratan de achegarlle a Xesús uns nenos e nenas que están a brincar por alí. O único que buscan é que aquel home de Deus os poida tocar para comunicarlles algo da súa forza e da súa vida. Ao parecer, era unha crenza popular.
Os discípulos moléstanse e tratan de impedilo. Pretenden levantar un cerco en torno a Xesús. Atribúense o poder de decidiren quen poden chegar ata Xesús e quen non. Interpóñense entre el e os máis pequenos, fráxiles e necesitados daquela sociedade. No canto de facilitárenlles o seu acceso a Xesús, obstaculízanllelo.
Esquecéronse xa do xesto de Xesús que, uns días antes, puxo no centro do grupo a un neno para que aprenderan ben que son os pequenos os que han ser o centro de atención e coidado dos seus discípulos. Esqueceron como o abrazou diante de todos, invitándoos a acollelos no seu nome e co seu mesmo agarimo.
Xesús indígnase. Aquel comportamento dos seus discípulos é intolerábel. Enfadado, dálles dúas ordes: «Deixade que os nenos se acheguen a min. Non llo impidades». Quen lles ensinou a actuaren dun xeito tan contrario ao seu Espírito? Son, precisamente, os pequenos, débiles e indefensos, os primeiros que han ter aberto o acceso a Xesús.
A razón é moi profunda pois obedece aos designios do Pai: «Dos que son como eles é o reino de Deus». No reino de Deus e no grupo de Xesús, os que molestan non son os pequenos, senón os grandes e poderosos, os que queren dominar e seren os primeiros.
O centro da súa comunidade non ha estar ocupado por persoas fortes e poderosas que se impoñen aos demais desde arriba. Na súa comunidade necesítanse homes e mulleres que buscan o último lugar para acolleren, serviren, abrazar e bendicir aos máis débiles e necesitados.
O reino de Deus non se difunde desde a imposición dos grandes senón desde a acollida e defensa dos pequenos. Onde estes se converten no centro de atención e coidado, aí está chegando o reino de Deus, a sociedade humana que quere o Pai.
José Antonio Pagola
Tradutor: Xaquin Campo Freire
