IRMOS DETRÁS DE XESÚS
Cando o Bautista foi detido, Xesús veu a Galilea e comezou a «proclamar a Boa Noticia de Deus». Segundo Marcos, non ensina propiamente unha doutrina para que os seus discípulos a aprendan e difundan correctamente. Xesús anuncia un acontecemento que xaestá ocorrendo. El xao está avivir e quere compartir a súa experiencia con todos.
Marcos resume así a súa mensaxe: «Cumpriuse o prazo»: xa non hai que mirar cara atrás. «Está preto o reino de Deus»: pois quere construír un mundo máis humano. «Convertédevos»: non podedes seguir coma se nada estivese ocorrendo; cambiade o voso xeito de pensar e de actuar. «Crede nesta Boa Noticia». Este proxecto de Deus é a mellor noticia que podedes escoitar.
Logo deste solemne resumo, a primeira actuación de Xesús é buscar colaboradores para levar adiante o seu proxecto. Xesús vai «pasando xunto ao lago de Galilea» comezou o seu camiño. É un profeta itinerante que busca seguidores para facer con eles un percorrido apaixonante: vivir abrindo camiños ao reino de Deus. Non é un rabino sentado na súa cátedra, que busca alumnos para formar unha escola relixiosa. Ser cristián non é aprender doutrinas, senón seguirmos a Xesús no seu proxecto de vida.
O que toma a iniciativa sempre é Xesús. Achégase, fixa a súa mirada naqueles catro mariñeiros e chámaos a daren unha orientación nova ás súas vidas. Sen a súa intervención, non nace nunca un verdadeiro cristián. Os crentes temos de vivirmos con máis fe a presenza viva de Cristo e a súa mirada sobre cada un de nós. Se non é el, quen pode dar unha nova orientación ás nosas vidas?
Pero o máis decisivo é escoitarmos desde dentro a súa chamada: «Vinde detrás de min». Non é tarefa dun día. Escoitar esta chamada significa espertarmos á confianza en Xesús, reavivarmos a nosa adhesión persoal a el, termos fe no seu proxecto, identificármonos co seu programa, reproducirmos en nós as súas actitudes? e, deste xeito, gañar máis persoas para o seu proxecto.
Este podería ser hoxe un bo lema para unha comunidade cristiá: Ir detrás de Xesús. Poñelo á fronte de todos. Recordalo cada domingo como o líder que vai por diante de nós. Xerar unha nova dinámica. Centralo todo en seguirmos máis de cerca a Xesús Cristo. As nosas comunidades cristiás transformaríanse. A Igrexa sería diferente.
José Antonio Pagola
Tradutor: Xaquin Campo Freire
