XESÚS AMA AOS RICOS
O encontro de Xesús co rico Zaqueu é un relato coñecido. A escena foi moi traballada por Lucas, preocupado talvez pola dificultade que atopaban algunhas familias ricas para integrárense nas primeiras comunidades cristiás.
Zaqueu é un rico ben coñecido en Xericó. «Pequeno de estatura», pero poderoso «xefe dos recadadores» que controlan o paso de mercancías e mercadorías nunha importante encrucillada de camiños. Non é un home querido. A xente considérao «pecador», excluído da Alianza. Vive explotando aos demais. «Non é fillo de Abrahán».
Con todo, este home quere ver «quen é Xesús». Oíu falar del, pero non o coñece. Non lle importa facer o ridículo actuando de xeito pouco acorde coa súa dignidade: coma un rapaz máis «bota a correr» para pillarlles a dianteira a todos e sóbese a unha figueira». Só busca «ver» a Xesús. Probavelmente nin el mesmo sabe ben que está a buscar a paz, a verdade, un sentido máis digno para a súa vida.
Ao chegar Xesús a aquel punto, «ergue os ollos» e ve a Zaqueu. O relato suxire un intercambio de miradas entre o profeta defensor dos pobres e aquel rico explotador. Xesús chámao polo seu nome: «Zaqueu, baixa de seguida». Non hai que perder máis tempo. «Hoxe mesmo teño de aloxarme na túa casa e estar contigo». Xesús quere entrar no mundo deste rico.
Zaqueu ábrelle a porta da súa casa con alegría. Déixao entrar no seu mundo de diñeiro e poder, mentres en Xericó todos critican a Xesús por entrar «na casa dun pecador».
Ao contacto con Xesús Zaqueu cambia. Empeza a pensar nos «pobres»: compartirá con eles os seus bens. Acórdase dos que son vítimas dos seus negocios: devolveralles con fartura o que lles roubou. Deixa que Xesús introduza na súa vida verdade, xustiza e compaixón. Zaqueu séntese outro. Con Xesús todo é posíbel.
Xesús alégrase porque a «salvación» chegou tamén a esa casa poderosa e rica. A isto veu el: «buscar e salvar o que está perdido». Xesús é sincero: a vida dos que son escravos do diñeiro son vidas perdidas, vidas sen verdade, sen xustiza e sen compaixón cara aos que sofren. Pero Xesús ama aos ricos. Non quere que ningún deles bote a perder a súa vida. Todo rico que lle deixe entrar no seu mundo experimentará a súa forza salvadora.
José Antonio Pagola
Tradutor: Xaquin Campo Freire
