PROCURA CREATIVA
Malia a súa aparente inocencia, a parábola dos talentos agocha unha carga explosiva. É sorprendente ver que o terceiro criado é condenado sen cometer ningunha mala acción. O seu único erro consiste en non facer nada: non arrisca o seu talento, non o fai frutificar, consérvao intacto nun lugar seguro.
A mensaxe de Xesús é clara. Non ao conservadorismo, si á creatividade. Non a unha vida estéril, si á resposta activa a Deus. Non á obsesión pola seguridade, si ao esforzo arriscado por transformar o mundo. Non á fe enterrada baixo o conformismo, si ao traballo comprometido en abrir camiños ao reino de Deus.
O gran pecado dos seguidores de Xesús pode ser sempre o de non arriscarnos a seguilo de xeito creativo. É significativo observar a linguaxe que se empregou entre os cristiáns ao longo dos anos para vermos en que centramos con frecuencia a atención: conservar o depósito da fe; conservar a tradición; conservar os bos costumes; conservar a graza; conservar a vocación, conservar…
Esta tentación de conservadorismo é máis forte en tempos de crise relixiosa. É fácil entón invocar a necesidade de controlar a ortodoxia, reforzar a disciplina e a normativa, asegurar a pertenza á Igrexa… Todo pode ser explicábel, pero, non é con frecuencia un xeito de desvirtuarmos o Evanxeo e conxelar a creatividade do Espírito?
Para os dirixentes relixiosos e os responsábeis das comunidades cristiás pode ser máis cómodo «repetir» de xeito monótono os camiños herdados do pasado, ignorando os interrogantes, as contradicións e as formulacións do home moderno, pero, de que serve todo iso se non somos capaces de transmitir luz e esperanza aos problemas e sufrimentos que sacoden aos homes e mulleres dos nosos días?
As actitudes que temos de coidarmos hoxe no interior da Igrexa non se chaman «prudencia», «fidelidade ao pasado», «resignación»… Levan máis ben outro nome: «procura creativa», «audacia», «capacidade de risco», «escoita do Espírito», que todo o fai novo.
O máis grave pode ser, o mesmmiño que co terceiro criado da parábola, que tamén nós creamos que estamos respondendo fielmente a Deus coa nosa actitude conservadora, cando en realidade estamos defraudando as súas expectativas. O principal quefacer da Igrexa hoxe non pode ser conservar o pasado, senón aprender a comunicar a Boa Noticia de Xesús nunha sociedade sacudida por cambios socioculturais sen precedentes.
José Antonio Pagola
Tradutor: Xaquin Campo Freire
