DESBERDIN IZATEARI BELDUR
Laster ikusi ahal izan zuen Jesusek zer espero zezakeen bere herriagandik. Ebanjelariek ez dizkigute ezkutatu Jesusek topatu zituen aurkaritza, eskandalua eta kontraesana, ingurumari hurbilekoenean berean ere. Beraren jarduera aske eta askatzailea gogaikarri gertatu ohi zen. Bere portaeraz interes gehiegi ipintzen zuen Jesusek arriskuan.
Bere jarduera profetikoaren hasieratik daki hori. Zail du Jainkoari leial entzunez jardutea erabakitzen duen batek, zail du berari atzea emanez bizi den herri batek onartua izatea. «Profeta bakar bat ere ez da ongi ikusia bere lurraldean».
Fededunok ez genuke ahaztu behar hori. Ezin pentsa dezakezu Jesusi leial jarraitu eta ez eragitea zure ingurumenean, nola edo hala, erreakzio bat, kritika bat, baita ukapen bat ere bizitzaren planteamendu ebanjeliko batekin, arrazoi batengatik edo besteagatik, ezin ados egon daitezkeen jendearen aldetik.
Nekez bizi ohi gara haize kontra. Beldurra diogu desberdin izateari. Aspalditik dator «modan egotea» nahi izatearen moda. Eta ez soilik neguko trajea erosteko orduan edota udako koloreak aukeratzean. «Modaren aginduak» den-dena ematen digu defendatu beharrekotzat: keinuak, moldeak, hizkuntza, ideiak, jarrerak eta posturak.
Adore-dosi handia behar izaten da norberaren konbentzimenduari leial eusteko, mundu guztia «ohi denari» egokitzen eta ahokatzen zaionean. Errazagoa da norberaren bizi-egitasmorik gabe bizitzea, konbentzionalismoak eraman gaitzan utziz. Errazagoa da bizitzan eroso finkatzea eta kanpotik agintzen digutenaren arabera bizitzea.
Hasieran, entzungo duzu agian barne ahots hori, esaten dizuna ez dela hori bide egokia pertsona eta fededun bezala hazten joateko. Baina laster lasaitzen gara. Ez duzu agertu nahi «anormal» edo «pertsona bitxi» bezala. Seguruago sentitzen zara artaldetik irten gabe.
Eta horrela jarraitzen dugu bide eginez. Artaldean. Bitartean, ordea, Jesusen egitasmoari leial izateko gonbidatuz jarraitzen du Ebanjelioak, gizartearen zati baten, Elizaren baitan berean ere, kritika eta, are, ukapena ekarriko badigu ere.
José Antonio Pagola
Itzultzailea: Dionisio Amundarain
