BIZI IZAN BEZALA HIL ZEN
Nola bizi zituen Jesusek bere azken orduak? Zein izan zuen bere jarrera erail zuten unean? Ebanjelioak ez dira luzatu haren sentimenduak analizatzen. Soil-soilik gogorazi digute bizi izan zen bezala hil zela. Lukasek, esaterako, Jesusek azkeneraino agertu zuen onberatasuna azpimarratu du, sufritzen zutenekiko hurbiltasuna eta barkatzeko zuen gaitasuna. Lukasen kontaeraren arabera, maitatuz hil zen Jesus.
Gurutzera bidean kondenatuak igarotzean begira dagoen jendetzaren artean, emakume batzuk hurbildu zaizkio Jesusi negarrez. Ezin jasan dute hura sufritzen ikustea. Jesus «haiengana itzuli» eta begira-begira jarri zaie samurtasunez, aspalditik egin ohi zien bezala: «Ez negar egin nigatik, negar egizue zeuengatik eta zeuen seme-alabengatik». Horrela doa Jesus gurutzerantz: gehiago pentsatzen du ama gajo haiengan bere sufrimenduan baino.
Ordu gutxi falta dira azkenerako. Gurutzetik batzuen irainak eta gurutzean direnen oinaze-oihuak bakarrik entzuten dira. Bat-batean, gurutzekoetako batek Jesusi diotso: «Gogoratu zaitez nitaz». Berehala erantzun dio Jesusek: «Nik diotsut: gaur nirekin izango zara paradisuan». Beti egin izan du gauza bera: beldurra kendu, Jainkoarekiko konfiantza isuri, esperantza kutsatu. Hori egiten jarraitu du azkeneraino.
Gurutzean iltzatzearen unea ahantzezina da. Soldaduak gurutzean iltzatzen ari diren bitartean, Jesusek diotso: «Aita, barka iezaiezu, ez dakite-eta zer ari diren». Horrelakoa da Jesus. Horrela bizi izan da beti: bekatariei Aitaren barkazioa eskainiz, merezi ez badute ere. Lukasen arabera, Jesus hil, Aitari bera gurutzean josten ari direnak bedeinkatuz jarrai dezan erregutuz hil da, guztiei, bera erailtzen ari direnei ere, bere maitasuna, bere barkazioa eta bere bakea eskainiz jarrai dezan.
Ez da harritzekoa Tartsoko Paulok Korintoko kristauei egin dien gonbita, Gurutziltzatuagan den misterioaren bila saia daitezen: «Mundua berekin adiskidetzen ari zen Jainkoa Kristogan, gizon-emakumeen hausturak kontuan hartu gabe». Horrela dago Kristo gurutzean: ez guri geure bekatua leporatuz, baizik eta bere barkazioa eskainiz.
José Antonio Pagola
Itzultzailea: Dionisio Amundarain
