NOVO COMEZO
Os evanxelistas describen con diferentes linguaxes a misión que Xesús confía aos seus seguidores. Segundo Mateu han «facer discípulos» que aprendan a viviren como el lles ensinou. Segundo Lucas, han ser «testemuñas» do que viviron cabo del. Marcos resúmeo todo dicindo que han «proclamar o Evanxeo a toda a creación».
Quen se achega hoxe a unha comunidade cristiá non se atopa directamente co Evanxeo. O que perciben é o funcionamento dunha relixión envellecida, con graves signos de crises. Non poden identificaren con claridade no interior desa relixión a Boa Noticia proveniente do impacto provocado por Xesús fai vinte séculos.
Por outra banda, moitos cristiáns non coñecen directamente o Evanxeo. Todo o que saben de Xesús e a súa mensaxe é o que poden reconstruíren de xeito parcial e fragmentario, recordando o que escoitaron a catequistas e predicadores. Viven a súa relixión privados do contacto persoal co Evanxeo.
Como poderán proclamalo se non o coñecen nas súas propias comunidades? O Concilio Vaticano II recordou algo demasiado esquecido nestes momentos: «O Evanxeo é, en todos os tempos, o principio de toda a súa vida para a Igrexa». Chegou o momento de entender e configurar a comunidade cristiá coma un lugar onde o primeiro é acoller o Evanxeo de Xesús.
Nada pode rexenerar tanto o tecido en crise das nosas comunidades como a forza do Evanxeo. Só a experiencia directa e inmediata do Evanxeo pode revitalizar a Igrexa. Dentro duns anos, cando a crise nos obrigue a centrármonos só no esencial, veremos con claridade que nada é máis importante hoxe para os cristiáns do que reunírmonos a ler, escoitar e compartir xuntos os relatos evanxélicos.
O primeiro é crer na forza rexeneradora do Evanxeo. Os relatos evanxélicos ensínannos a vivirmos a fe non por obrigación, senón por atracción. Fan vivir a vida cristiá non como deber, senón como irradiación e contaxio. É posíbel introducirmos nas parroquias unha dinámica nova. Reunidos en pequenos grupos, en contacto co Evanxeo, iremos recuperando a nosa verdadeira identidade de seguidores de Xesús.
Temos de volvermos ao Evanxeo como novo comezo. Xa non serve calquera programa ou estratexia pastoral. Dentro duns anos, escoitar xuntos o Evanxeo de Xesús non será unha actividade máis entre outras, senón a matriz desde a que comezará a rexeneración da fe cristiá nas pequenas comunidades dispersas no medio dunha sociedade secularizada.
Ten razón o papa Francisco cando nos di que o principio e motor da renovación da Igrexa, nestes tempos, temos de atopalo en «volvermos á fonte e recuperarmos a frescura orixinal do Evanxeo».
José Antonio Pagola
Tradutor: Xaquin Campo Freire
