CADA DOMINGO
Para celebrarmos a eucaristía dominical non basta con seguir as normas prescritas ou pronunciar as palabras obrigadas. Non basta tampouco cantar, santiguarnos ou darnos a paz no momento adecuado. É moi fácil asistir á misa e non celebrar nada no corazón; ouvir as lecturas correspondentes e non escoitarmos a voz de Deus; comulgar piadosamente sen comulgarmos con Cristo; darnos a paz sen reconciliarnos con ninguén. Como vivirmos a misa do domingo coma unha experiencia que renove e fortaleza a nosa fe?
Para empezar, habemos escoitar con atención e alegría a Palabra de Deus, e en concreto o evanxeo de Xesús. Durante a semana vemos a televisión, escoitamos a radio e lemos a prensa. Vivimos aparvados por toda clase de mensaxes, voces, noticias, información e publicidade. Necesitamos escoitar outra voz diferente que nos cure por dentro.
É un respiro escoitarmos as palabras directas e sinxelas de Xesús. Traen verdade á nosa vida. Libérannos de enganos, medos e egoísmos que nos fan dano. Ensínannos a vivirmos con máis sinxeleza e dignidade, con máis sentido e esperanza. É unha sorte facermos o percorrido da vida guiados cada domingo pola luz do evanxeo.
A pregaria eucarística constitúe o momento central. Non nos podemos distraer. «Levantamos o corazón» para darmos grazas a Deus. É bo, xusto e necesario agradecer a Deus pola vida, pola creación enteira e polo agasallo que é Xesús Cristo. A vida non é só traballo, esforzo e axitación. É tamén celebración, acción de grazas e encomio a Deus. É bo reunírmonos cada domingo para sentirmos a vida como agasallo e dar grazas ao Creador.
A comuñón con Cristo é decisiva. É o momento de acoller a Xesús na nosa vida para experimentalo en nós, identificármonos con el e deixarnos traballar, consolar e fortalecer polo seu Espírito. Todo isto non o vivimos fechados no noso pequeno mundo. Cantamos xuntos o Noso Pai sentíndonos irmáns de todos. Pedímoslle que a ninguén lle falte o pan nin o perdón. Dámonos a paz e buscámola para todos.
José Antonio Pagola
Tradutor: Xaquin Campo Freire
