RESPONDER Á LUZ
Segundo o gran teólogo Paul Tillich, a gran traxedia do home moderno é perder a dimensión de profundidade. Xa non é capaz de preguntarse de onde vén e a onde vai. Non sabe interrogarse polo que fai e debe facer de si mesmo neste breve lapso de tempo entre o seu nacemento e a súa morte.
Estas preguntas non atopan xa resposta algunha en moitos homes e mulleres de hoxe. Aínda máis, nin sequera son suscitadas cando se perdeu esa «dimensión de profundidade». As xeracións actuais non teñen xa a coraxe de suscitárense estas cuestións coa seriedade e a fondura con que o fixeron as xeracións pasadas. Prefiren seguir camiñando en tebras.
Por iso, nestes tempos temos de volver recordar que ser crente é, antes nada, preguntar apaixonadamente polo sentido da nosa vida e estarmos abertos a unha resposta, aínda cando non a vexamos de xeito claro e preciso.
O relato dos magos foi visto polos Pais da Igrexa como exemplo duns homes que, aínda vivindo nas tebras do paganismo, foron capaces de responder fielmente á luz que os chamaba á fe. Son homes que, coa súa actuación, nos invitan a escoitarmos toda chamada que nos urxe a camiñarmos de xeito fiel cara a Cristo.
A nosa vida transcorre con frecuencia nas cortizas da existencia. Traballos, contactos, problemas, encontros, ocupacións diversas, lévannos e tráennos; e imos pasando a vida enchendo cada instante con algo que habemos facer, dicir, ver ou planear.
Corremos así o risco de perdermos a nosa propia identidade, convertérmonos nunha cousa máis entre outras e vivimos sen sabermos xa en que dirección camiñar. Hai unha luz capaz de orientar a nosa existencia? Hai unha resposta aos nosos anhelos e aspiracións máis profundas? Desde a fe cristiá, esa resposta existe. Esa luz brilla xa nese Neno nado en Belén.
O importante é tomar conciencia de que vivimos en tebras, de que perdemos o sentido fundamental da vida. Quen recoñece isto non se atopa lonxe de iniciar a procura do camiño acertado.
Oxalá no medio do noso vivir diario non perdamos nunca a capacidade de estarmos abertos a toda luz que poida iluminar a nosa existencia, a toda chamada que poida dar profundidade á nosa vida.
José Antonio Pagola
Tradutor: Xaquin Campo Freire
