ESCOITARMOS O QUE DI O ESPÍRITO
Os primeiros cristiáns vivían convencidos de que para seguiren a Xesús é insuficiente un bautismo de auga ou un rito parecido. É necesario vivirmos empapados do seu Espírito Santo. Por iso nos evanxeos recóllense de diversos xeitos estas palabras do Bautista: «Eu bauticeivos con auga, pero el (Xesús) havos bautizar con Espírito Santo».
Non é estraño que nos momentos de crises recordasen de xeito especial a necesidade de viviren guiados, sostidos e fortalecidos polo seu Espírito. A Apocalipse, escrita nos momentos críticos que vive a Igrexa baixo o emperador Domiciano, repite unha e outra vez aos cristiáns: «O que teña oídos, que escoite o que o Espírito di ás Igrexas».
A mutación cultural sen precedentes que estamos a vivirmos, estanos pedindo hoxe aos cristiáns unha fidelidade ao Espírito de Xesús sen precedentes. Antes de pensarmos en estratexias e receitas pastorais ante a crise, temos de preguntármonos como estamos acollendo nós o Espírito de Xesús.
No canto de lamentármonos unha e outra vez da secularización crecente, temos de preguntármonos que camiños novos anda buscando hoxe Deus para atoparse cos homes e mulleres do noso tempo; como temos de renovarmos o noso xeito de pensar, de dicir e de vivir a fe para que a súa Palabra poida chegar ata os interrogantes, as dúbidas e os medos que abrollan no seu corazón.
Antes de elaborarmos proxectos pensados ata os seus últimos detalles, necesitamos transformar a nosa mirada, a nosa actitude e a nosa relación co mundo de hoxe. Necesitamos parecérmonos máis a Xesús. Deixármonos traballar polo seu Espírito. Só Xesús pode darlle á Igrexa un rostro novo.
O Espírito de Xesús segue vivo e operante tamén hoxe no corazón das persoas, aínda que nós nin nos preguntemos como se relaciona con quen se afastaron definitivamente da Igrexa. chegou o momento de aprendermos a ser a «Igrexa de Xesús» para todos, e isto só el nolo pode ensinar.
Non temos de falar só en termos de crises. Estanse creando unhas condicións nas que o esencial do evanxeo pode resoar de xeito novo. Unha Igrexa máis fráxil, débil e humilde pode facer que o Espírito de Xesús sexa entendido e acollido con máis verdade.
José Antonio Pagola
Tradutor: Xaquin Campo Freire
