FOGARES CRISTIÁNS
Hoxe fálase moito da crise da institución familiar. Certamente, a crise é grave. Con todo, aínda que estamos sendo testemuñas dunha verdadeira revolución na conduta familiar, e moitos predicaron a morte de diversas formas tradicionais de familia, ninguén anuncia hoxe seriamente a desaparición da familia.
Ao contrario, a historia parece ensinarnos que nos tempos difíciles aínda se estreitan máis os vínculos familiares. A abundancia separa aos homes. A crise e a penuria únenos. Ante o presentimento de que imos vivir tempos difíciles, son bastantes os que presaxian un novo renacer da familia.
Con frecuencia, o desexo sincero de moitos cristiáns de imitaren á Familia de Nazaret favoreceu o ideal dunha familia cimentada na harmonía e a felicidade do propio fogar. Sen dúbida é necesario tamén hoxe promovermos a autoridade e responsabilidade dos pais, a obediencia dos fillos, o diálogo e a solidariedade familiar. Sen estes valores a familia fracasará.
Pero non unha familia calquera responde ás esixencias do reino de Deus suscitadas por Xesús. Hai familias abertas ao servizo da sociedade e familias egoístas, repregadas sobre si mesmas. Familias autoritarias e familias onde se aprende a dialogar. Familias que educan no egoísmo e familias que ensinan solidariedade.
Concretamente, no contexto da grave crise económica que estamos a padecer, a familia pode ser unha escola de insolidariedade na que o egoísmo familiar se converte en criterio de actuación que configurará o comportamento social dos fillos. E pode ser, pola contra, un lugar no que o fillo pode recordar que temos un Pai común, e que o mundo non se acaba nas paredes da propia casa.
Por iso non podemos celebrarmos a festa da Familia de Nazaret sen escoitarmos o reto da nosa fe. Serán os nosos fogares un lugar onde as novas xeracións poderán escoitaren a chamada do Evanxeo á fraternidade universal, a defensa dos abandonados e á procura dunha sociedade máis xusta, ou onde se convertan na escola máis eficaz de indiferenza, inhibición e pasividade egoísta ante os problemas alleos?
José Antonio Pagola
Tradutor: Xaquin Campo Freire
