UNHA FAMILIA DIFERENTE
Entre os católicos deféndese case instintivamente o valor da familia, pero non sempre nos detemos a reflexionar o contido concreto dun proxecto familiar, entendido e vivido desde o Evanxeo.
Como sería unha familia inspirada en Xesús? A familia, segundo el, ten a súa orixe no misterio do Creador que atrae á muller e ao varón a seren «unha soa carne», compartindo a súa vida nunha entrega mutua, animada por un amor libre e gratuíto. Isto é o primeiro e decisivo. Esta experiencia amorosa dos pais pode procrear unha familia sa.
Seguindo a chamada profunda do seu amor, os pais convértense en fonte de vida nova. É a súa tarefa máis apaixonante. A que pode dar unha fondura e un horizonte novo ao seu amor. A que pode consolidar para sempre a súa obra creadora no mundo.
Os fillos son un agasallo e unha responsabilidade. Un reto difícil e unha satisfacción incomparábel. A actuación de Xesús, defendendo sempre aos pequenos e abrazando e bendicindo aos nenos, suxire a actitude básica: coidar a vida fráxil de quen comezan a andadura por este mundo. Ninguén lles poderá ofrecer nada mellor.
Unha familia cristiá trata de vivir unha experiencia orixinal no medio da sociedade actual, indiferente e agnóstica: construír o seu fogar desde Xesús. «Onde dous ou tres se reúnen no meu nome, alí estou eu no medio de eles». É Xesús quen alenta, sostén e orienta a vida sa da familia cristiá.
O fogar convértese entón nun espazo privilexiado para vivir as experiencias máis básicas da fe cristiá: a confianza nun Deus Bo, amigo do ser humano; a atracción polo estilo de vida de Xesús; o descubrimento do proxecto de Deus, de construír un mundo máis digno, xusto e amábel para todos. A lectura do Evanxeo en familia é unha experiencia decisiva.
Nun fogar onde se vive a Xesús con fe sinxela, pero con paixón grande, medra unha familia acolledora, sensíbel ao sufrimento dos máis necesitados, onde se aprende a compartir e a comprometerse por un mundo máis humano. Unha familia que non se fecha só nos seus intereses senón que vive aberta á familia humana.
Moitos pais viven hoxe desbordados por diferentes problemas, e demasiado sos para enfrontárense á súa tarefa. Non poderían recibir unha axuda máis concreta e eficaz desde as comunidades cristiás? A moitos pais crentes faríalles moito ben atopárense, compartiren as súas inquietudes e apoiarse mutuamente. Non é evanxélico esixirlles tarefas heroicas e desentendérmonos logo das súas loitas e desvelos.
José Antonio Pagola
Tradutor: Xaquin Campo Freire
