PREGUNTAS DE ANO NOVO
Hoxe comezamos un «ano novo». Como será?, que espero eu do novo ano?, que desexo de verdade?, que é o que necesito?, a que dedicarei o meu tempo máis precioso e importante?, que sería para min algo realmente novo e bo neste ano que hoxe comeza?
Vivirei dun xeito calquera, pasando dunha ocupación a outra, sen saber exactamente que quero nin para que vivo, ou aprenderei a distinguir o importante e esencial do que é secundario? Vivirei de forma rutineira e aburrida, ou aprenderei a vivir con espírito máis creativo?
Seguirei este ano afastándome un pouco máis de Deus ou empezarei a buscalo con máis confianza e sinceridade? Seguirei un ano máis mudo diante del, sen abrir os meus beizos nin o meu corazón, ou xermolará por fin da miña alma malparada unha invocación pequena, humilde pero sincera?
Vivirei tamén este ano preocupado só polo meu benestar ou saberei preocuparme algunha vez de facer felices aos demais?, a que persoas me achegarei?, sementarei nelas alegría, ou contaxiarei desalento e tristeza? Por onde eu pase, será a vida máis amábel e menos dura?
Será un ano máis, dedicado a facer cousas e máis cousas, acumulando egoísmo, tensión e nerviosismo ou terei tempo para o silencio, o descanso, a oración e o encontro con Deus?, fechareime só nos meus problemas ou vivirei tratando de facer un mundo máis humano e habitábel?
Seguirei con indiferenza as noticias que día a día me chegarán desde os países da fame?, contemplarei impasíbel os corpos esnaquizados das xentes de Irak ou os afogados das pateras?, seguirei mirando con friaxe aos que veñen ata nós buscando traballo e pan? Cando aprenderei a mirar aos que sofren con corazón responsábel e solidario?
O «novo» deste ano non nos virá de fóra. A novidade só pode agromar do noso interior. Este ano será novo se aprendo a crer de xeito novo e máis confiado, se atopo xestos novos e máis amábeis para convivir cos meus, se esperto no meu corazón unha compaixón nova cara aos que sofren?
José Antonio Pagola
Tradutor: Xaquin Campo Freire
