HOXE
Lucas conclúe o seu relato do nacemento de Xesús indicando aos lectores que «María gardaba todas estas cousas e as meditaba no seu corazón». Non conserva o sucedido coma un recordo do pasado, senón como unha experiencia que actualizará e revivirá ao longo da súa vida.
Non é unha observación gratuíta. María é modelo de fe. Segundo este evanxelista, crermos en Xesús Salvador non é recordarmos acontecementos doutros tempos, senón experimentarmos hoxe a súa forza salvadora, capaz de facer máis humana a nosa vida.
Por iso Lucas utiliza un recurso literario moi orixinal. Xesús non pertence ao pasado. Intencionadamente vai repetindo que a salvación de Xesús resucitado estásenos a ofrecer hoxe, agora mesmo, sempre que nos atopamos con el. Vexamos algúns exemplos.
Así se nos anuncia o nacemento de Xesús: «Naceuvos hoxe, na cidade de David, un Salvador». Hoxe pode nacer Xesús para nós. Hoxe pode entrar na nosa vida e cambiala para sempre. Agora mesmo podemos nacer con el á unha existencia nova.
Nunha aldea de Galilea traen un paralítico ante Xesús. Xesús conmóvese ao velo bloqueado polo seu pecado e sándao ofrecéndolle o perdón: «Os teus pecados fican perdoados». A xente reacciona encomiando a Deus: «Hoxe vimos cousas admirábeis». Tamén nós podemos experimentar hoxe o perdón, a paz de Deus e a alegría interior se nos deixamos sandar por Xesús.
Na cidade de Xericó, Xesús hospédase na casa de Zaqueu, rico e poderoso recadador de impostos. O encontro con Xesús transfórmao: devolverá o roubado a tanta xente e compartirá os seus bens cos pobres. Xesús dille: «Hoxe chegou a salvación a esta casa».
Se deixamos entrar a Xesús na nosa vida, hoxe mesmo podemos empezar unha vida máis digna, fraterna e solidaria.
Xesús está agonizando na cruz no medio de dous malfeitores. Un deles confíase a Xesús: «Acórdate de min cando esteas no teu reino». Xesús reacciona inmediatamente: «Hoxe estarás comigo no paraíso». Tamén o día da nosa morte será un día de salvación. Por fin escoitaremos de Xesús esas palabras tan esperadas: «Descansa, confía en min, hoxe estarás comigo para sempre».
Hoxe comezamos un ano novo. Pero que pode ser para nós algo realmente novo e bo? Quen fará nacer en nós unha alegría nova? Que psicólogo nos ensinará a sermos máis humanos? De pouco serven os bos desexos. O decisivo é estarmos máis atentos ao bo que Xesús esperta en nós. A salvación ofrécesenos cada día. Non hai que esperar nada. Hoxe mesmo pode ser para min un día de salvación.
José Antonio Pagola
Tradutor: Xaquin Campo Freire
