O ESENCIAL DO CREDO
Ao longo dos séculos, os teólogos cristiáns elaboraron profundos estudos sobre a Trinidad. Con todo, bastantes cristiáns dos nosos días non logran captar que teñen que ver coa súa vida esas admirables doutrinas.
Ao parecer, hoxe necesitamos oírmos falar de Deus con palabras humildes e sinxelas, que toquen o noso pobre corazón, confuso e desalentado, e reconforten a nosa fe vacilante. Necesitamos, talvez, recuperarmos o esencial do noso credo para aprendermos a vivilo con alegría nova.
«Creo en Deus Pai, creador do ceo e da terra».
Non estamos sos ante os nosos problemas e conflitos. Non vivimos esquecidos Deus é o noso «Pai» querido. Así o chamaba Xesús e así o chamamos nós. El é a orixe e a meta da nosa vida. Creounos a todos só por amor, e espéranos a todos con corazón de Pai ao final da nosa peregrinación por este mundo.
O seu nome é hoxe esquecido e negado por moitos. Os nosos fillos vanse afastando del, e os crentes non sabemos contaxiarlles a nosa fe, pero Deus séguenos mirando a todos con amor. Aínda que vivamos cheos de dúbidas, non habemos perder a fe nun Deus Creador e Pai, pois perderiamos a nosa última esperanza.
«Creo en Xesús Cristo, o seu único Fillo, o noso Señor».
É o gran agasallo que Deus fixo ao mundo. El contounos como é o Pai. Para nós, Xesús nunca será un home máis. Mirándoo a el, vemos ao Pai: nos seus xestos captamos a súa tenrura e comprensión. Nel podemos sentir a Deus humano, próximo, amigo.
Este Xesús, o Fillo amado de Deus, animounos a construír unha vida máis fraterna e ditosa para todos. É o que máis quere o Pai. Indicounos, ademais, o camiño a seguir: «Sede compasivos como o voso Pai é compasivo». Si esquecemos a Xesús, quen ocupará o seu baleiro?, quen nos poderá ofrecer a súa luz e a súa esperanza?
«Creo no Espírito Santo, Señor e dador de vida».
Este misterio de Deus non é algo afastado. Está presente no fondo de cada un de nós. Podémolo captar como Espírito que alenta as nosas vidas, como Amor que nos leva cara aos que sofren. Este Espírito é o mellor que hai dentro de nós.
José Antonio Pagola
Tradutor: Xaquin Campo Freire
