QUE RELIXIÓN É A NOSA?
Todos os evanxeos fanse eco dun xesto audaz e provocativo de Xesús dentro do recinto do Templo de Xerusalén. Probabelmente non foi moi espectacular. Atropelou a un grupo de vendedores de pombas, envorcou as mesas dalgúns cambistas e tratou de interromper a actividade durante algúns momentos. Non puido facer moito máis.
Con todo, aquel xesto cargado de forza profética foi o que desencadeou a súa detención e rápida execución. Atacar o Templo era atacar o corazón do pobo xudeu: o centro da súa vida relixiosa, social e política. O Templo era intocábel. Alí habitaba o Deus de Israel. Que sería do pobo sen a súa presenza entre eles? Como poderían sobreviviren sen o Templo?
Para Xesús, con todo, era o gran obstáculo para acoller o reino de Deus tal como el o entendía e proclamaba. O seu xesto puña en cuestión o sistema económico, político e relixioso sustentado desde aquel «lugar santo».
Que era aquel Templo? Signo do reino de Deus e a súa xustiza ou símbolo de colaboración con Roma? Casa de oración ou almacén dos décimos e primicias dos campesiños? Era o santuario do perdón de Deus ou o lugar de xustificación de toda clase de inxustizas?
Aquilo era un «mercado». Mentres na contorna da «casa de Deus» se acumulaba a riqueza, nas aldeas aumentaba a miseria dos seus fillos. Non. Deus non lexitimaría xamais unha relixión como aquela. A perversión do Templo. O Deus dos pobres non podía reinar desde aquel Templo. Coa chegada do seu reinado perdía a súa razón de ser.
A actuación de Xesús ponnos en garda a todos os seus seguidores e obríganos a preguntármonos seriamente que relixión estamos a cultivar nos nosos templos. A perversión dos nosos templos. Se non está inspirada por Xesús, pódese converter nunha maneira «santa» de pechármonos ao proxecto de Deus que Xesús quería impulsar no mundo. O primeiro non é a relixión, senón o reino de Deus.
Que relixión é a nosa? Fai medrar a nosa compaixón polos que sofren ou permítenos vivirmos tranquilos no noso benestar? Alimenta os nosos propios intereses ou ponos a traballar por un mundo máis humano? Se se parece á do Templo xudeu, Xesús non a bendiciría.
José Antonio Pagola
Tradutor: Xaquin Campo Freire
