POZTU ZAITEZ
Mariari aingeruak egin dion iragarpena gonbit bat da: geugan iratzar ditzagun zenbait oinarrizko jarrera, zaindu beharrekoak geure fedea gozoro eta konfiantzaz bizi ahal izateko. Aski da erreparatzea aingeruan ahoan jarri duten mezuari.
«Poztu zaitez». Horixe da Mariak Jainkoagandik lehenik entzun duena, geuk ere lehenik entzun beharko genukeena. «Poztu zaitez»: horixe da Jainkoaren lehen hitza sorkari orori. Geure aldi honetan, geuri ziurtasun gabeko eta ilun, problemaz eta zailtasunez betea, iruditzen zaigun honetan, lehenik eskatzen digutena poza ez galtzea da. Pozik gabe, bizitza zailago eta latzago gertatzen da.
«Jauna zurekin». Gonbitean eskatzen zaigun poza ez da, ez baikortasun behartu bat, ez autoengainu erraz bat. Barne poza da, sortzen zaiona da bizitzari konbentzimenduz begiratzen dionari ezen ez dagoela bera bakarrik. Fedetik sortzen den poza da. Jainkoa bidelagun dugu, defendatzaile dugu eta gure onaren bila dabil beti. Gauza askoz kexa gintezke, baina ezin esango dugu inoiz ere bakarrik gaudela, ez baita egia. Gutako bakoitzaren barnean, izatearen hondorik hondoenean, Jainkoa dago, gure Salbatzailea.
«Ez beldur izan». Asko dira geure baitan sortzen ahal zaizkigun beldurrak. Beldurra geroari, beldurra gaixotasunari, beldurra heriotzari. Beldurra ematen digu sufritzeak, bakarrik gaudela sentitzeak, inork ez gaituela maite uste izateak. Beldurra sentitzen ahal diegu geure kontraesanei, geure inkoherentziei. Beldurra gauza txarra da, kalte egin du. Beldurrak ito egiten du bizitza, gerarazi indarrak, eragotzi bide egitea. Behar duguna konfiantza da, segurtasuna eta argia
«Graziadun gertatu zakizkio Jainkoari». Mariak ez ezik, guk ere entzun beharrekoak ditugu hitz hauek; izan ere, guztiok bizi eta hiltzen gara Jainkoaren graziak eta maitasunak sostengaturik. Bizitzak aurrera dagi, bere zailtasunak, kezkak eta guzti. Jainkoagan sinestea ez da errezeta bat eguneroko problemak askatzeko. Baina dena desberdin da, aipatu zailtasunei aurre egiteko, argia eta indarra Jainkoagan bilatuz bizi garenean.
Geure aldi honetan, ez da beti erraza, ez al ditugu iratzarri beharreko Jainkoaganako konfiantza eta berak onartzen gaituela jakitearen poza? Zergatik ez gara askatzen apur bat beldurretik eta estutasunetik, bizitzari aurre eginez hurbileko Jainkoaganako fedeaz?
José Antonio Pagola
Itzultzailea: Dionisio Amundarain
