OUTRO MUNDO
É POSÍBEL
Non sabemos con certeza como reaccionaron os discípulos do Bautista cando Herodes Antipas o encarcerou na fortaleza de Maqueronte. Coñecemos a reacción de Xesús. Non ficou no deserto. Tampouco se refuxiou entre os seus familiares de Nazaret. Comezou a percorrer as aldeas de Galilea ea predicar unha mensaxe orixinal e sorprendente.
O evanxelista Marcos resúmeo así: «marchou a Galilea proclamando a boa noticia de Deus». Xesús non repite a predicación do Bautista nin fala do seu bautismo no Xordán. Anuncia a Deus como algo novo e bo. Esta é a súa mensaxe.
«Cumpriuse o prazo»
O tempo de espera que se vive en Israel acabou. Terminou tamén o tempo do Bautista. Con Xesús comeza unha nova era. Deus non quere deixarnos sos ante os nosos problemas, sufrimentos e desafíos. Quere construír xunto connosco un mundo máis humano.
«Está chegando o reino de Deus»
Xesús, cunha audacia descoñecida, sorprende a todos anunciando algo que ningún profeta se atreveu a declarar: «Xa está aquí Deus, coa forza creadora da súa xustiza, tratando de reinar entre nós». Xesús experimenta a Deus como unha Presenza boa e amigábel que está buscando abrirse camiño entre nós para humanizar a nosa vida.
Por iso toda a vida de Xesús é unha chamada á esperanza. Hai alternativa. Non é verdade que a historia teña de discorrer polos camiños da inxustiza que lle trazan os poderosos da terra. É posíbel un mundo máis xusto e fraterno. Podemos modificarmos a traxectoria da historia.
«Convertédevos»
Xa non é posíbel vivirmos coma se nada estivese sucedendo. Deus pide aos seus fillos colaboración. Por iso Xesús grita: «Cambiade o xeito de pensar e de actuar». Somos as persoas as que primeiro temos de cambiar. Deus non impón nada pola forza, pero está sempre atraendo as nosas conciencias cara a unha vida máis humana.
«Crede nesta boa noticia»
Tomádea en serio. Espertade da indiferenza. Mobilizade as vosas enerxías. Crede que é posíbel humanizar o mundo. Crede na forza liberadora do Evanxeo. Crede que é posibel a transformación. Introducide no mundo a confianza.
Que fixemos desta mensaxe apaixonante de Xesús? Como o puidemos esquecer? Con que o substituímos? Se o primeiro é «buscarmos o reino de Deus e a súa xustiza», en que nos estamos a entreter? Como podemos vivirmos tranquilos observando que o proxecto creador de Deus dunha terra chea de paz e de xustiza está sendo aniquilado polos homes?
José Antonio Pagola
Tradutor: Xaquin Campo Freire
