JAINKOAREN AURPEGI BERRIA
Jada ez ziren itzuli ikasleak lehengoak berak izatera. Jesusekin, erail ondoan biziaz blai, topo egiteak goitik behera eraldatu zituen ikasleak. Dena beste era batean ikusten hasiak ziren. Jesusen pitzarazlea zen Jainkoa. Laster atera zituzten ondorioak.
Biziaren adiskide da Jainkoa. Jada ez zen inongo dudarik. Egia zen Jesusek esandako hura: «Jainkoa ez da hildakoen Jainko, baizik eta bizi direnena». Gizakiak mila eratan suntsi dezake bizia, baina, Jainkoak Jesus piztu badu, horrek esan nahi du berak bizia bakarrik nahi duela bere seme-alabentzat. Ez daude bakarrik, ezta galdurik ere heriotzaren aurrean. Esku-eskura dugu Aita, ororen gainetik, baita heriotzaren beraren gainetik ere, biziaz blai ikusi nahi gaitu. Aurrerantzean bizitzeko kristau-era bakar bat dago. Honela laburtzen da: bizia ezarri bestek heriotza ipintzen duten lekuan.
Behartsuena da Jainkoa. Jesusek esana zuen hori modu askotan, baina ez zen gauza erraza hori sinestea. Orain besterik da. Jainkoak Jesus piztu badu, egia dela esan nahi du: «Zorionekoak pobreak, Jainkoa berekin baitute». Azken hitza ez da, ez Tiberiorena, ez Pilatorena; azken erabakia ez dute, ez Kaifasek, ez Anasek. Jainkoa da inori axola ez zaizkionen azken defendatzailea. Bide bakarra da haren antzeko izateko: txikiak eta babesgabeak defendatu.
Jainkoak berpizten ditu gurutziltzatuak. Jainkoak erreakzionatu egin du Jesus gurutziltzatu dutenen zuzengabekeria kriminalaren aurrean. Berpiztu badu, zuzenbidea ezarri nahi duelako da, munduan gauzatzen den horrenbeste ankerkeria eta abusuren gainetik. Jainkoa ez dago gurutziltzatzen dutenen alde, gurutziltzatuekin dago. Bide bakarra dago bera imitatzeko: sufritzen dutenen ondoan egotea beti, sufriarazten dutenen aurka borroka egitea beti.
Jainkoak xukatuko ditu gure malkoak. Jainkoak piztu du Jesus. Guztiek uko egin diotenari harrera egin dio Jainkoak. Mespretxua jasan duena aintzatu egin du. Hildakoa inoiz baino biziago bizi da. Badakigu orain nolakoa den Jainkoa. Egun batean «berak xukatuko ditu gure malko guztiak, eta ez da jada heriotzarik izango, ez garrasirik, ez nekerik. Iragana izango da hori guztia».
José Antonio Pagola
Itzultzailea: Dionisio Amundarain
