ESPIRITUAREN INDAR SANEATZAILEA
Gaur egungo gizakia ohitzen ari da bizitzen, erantzunik eman gabe bizitzaren galdekizun funtsezkoenari: zergatik eta zertako bizi. Hau da gauzarik larriena: pertsona batek harreman oro galtzea bere barnetasunarekin eta misterioarekin; bizia, orduan, arrunkerian eta zentzurik gabezian erortzen da.
Uste hutsez, gauzen eta gertakizunen azal hutsean bizi ohi jendea orduan, bizi-itsura bakarrik eginez. Segur aski, biziaren arrunkeria hau da jende ez gutxiren sineste-gabeziaren sustrairik inportanteena.
Gizakiak, barnetasunik gabe bizi denean, galdu egiten du biziarekiko begirunea, beste pertsonekiko eta gauzekiko begirunea. Batez ere, ordea, ezgai bihurtzen da misterioa «entzuteko», bizitzaren hondoenean hesitu ohi den misterioa, alegia.
Gaur egungo gizakiak aurpegi ematen dio, aurka egiten dio, sakontasunari. Ez dago prest bere barne bizitza artatzeko. Halere, hasia da asegabetasuna sentitzen: sumatzen du zerbaiten beharra duela, egunean eguneko bizitzak ematen ez dion zerbaiten beharra. Asegabetasun horretan egon bide da salbazioaren hasiera.
Paul Tillich teologo handiak esan ohi zuen ezen Espirituak laguntzen ahal digula «sakontasunaren bidea» berriro topatzen. Aitzitik, Espiritu Santuaren aurka bekatu egitea, «geure bekatua betiko geure bekatu bihurtzea» izango litzatekeela.
Espirituak iratzar dezake gugan borroka egiteko gogoa, eguneroko arrunkeria baino zerbait jatorrago eta hobeagoren alde. Behar dugun ausardia eman diezaguke geuregan barneko lanari ekiteko.
Espirituak beste poz bat, desberdina, ernearaz dezake gure bihotzean; biziberri dezake gure bizitza zaharkitua; piztu dezake gugan maitasuna, gaur egun inolako ardurarik ikusten ditugunekiko beraiekiko ere.
Espiritua «gugan diharduen indarra da eta gurea ez dena». Jainkoa bera da, gure bizitza arnasten eta eraldatzen ari dena. Inork ezin esan du norbera ez dela Espiritu horren bizileku. Inporta duena, Espiritu hori ez itzaltzea da, zirikatzea beraren sua, sutan jarrai dezan egitea, gure bizitza garbituz eta eraberrituz. Agian, Jainkoari dei eginez hasi beharra dugu salmogilearekin: «Ez aldendu nigandik zeure Espiritua».
José Antonio Pagola
Itzultzailea: Dionisio Amundarain
